Derde Naweek

Hierdie naweek was 'n langnaweek: Vrydag 25 April is Anzac dag. Ek self was heeldag by die kantoor - ek het 'n hoë prioriteit "SAP support message" oop en hulle het gevra dat ek Vrydag beskikbaar bly... geen Anzac dag vir my nie. Vrydag aand het ek egter bietjie gaan fliek by Villag @ Crown.

Crown Entertainment Complex is 'n luukse hotel en casino met honderde eetplekke, flieks en arkade waar kinders hulleself kan besig hou. Dis een van die groot aantreklikhede in Melbourne, en sit reg oorkant die rivier van die Melbourne Akwarium. Dit is die grootste casino in Australasia. By die flieks by die Crown, net soos in Trinidad, kan jy kos koop en invat (bv. hotdog, chips & coke ens) maar in die fliek wat ek gekyk het was daar meestal net die reuk van popcorn.

Saterdag se weer was onplesierig - koud, bewolk en winderig, met ligte reën van tyd tot tyd. Ek het by die MetShop in die stad (publieke transport amptelike winkel) 'n hele paar brosjures en kaarte gekry wat baie behoort te help met verkenning op ander naweke. Terwyl ek in die stad was, het ek besluit om Queen Victoria Market te besoek en die City Circle Tram tot daar naby gevat.

So lyk die City Circle trams waarop mens verniet kan ry - hulle loop in 'n sirkel (twee rigtings) rondom die binnestad (hulle is nogal oud en omdat dit verniet is gewoonlik redelik vol ook):





Daar is nogal baie hype oor die mark maar Queen Vicotria Market is soos een massiewe vlooimark. Blykbaar is vars groente en vrugte daar baie goedkoper as in die winkels, maar Saterdag het dit vir my maar redelik dieselfde prys gelyk vir die goed wat ek al gekoop het - appels, komkommer, blaarslaai en tamaties. Daar is ook paar plekkies wat kos verkoop (pizza, hotdogs ens). Ander stalletjies in die mark is vars vleis, vis (stink nogal daar, gelukkig is die vis-deel bietjie verwyder van die res), kaas, speserye ens. Dan is daar die ander vlooimark goed soos die klere, spelgoed ens. Natuurlik kan jy daar ook lewendige hoenders koop...



Saterdag by die mark was daar live entertainment op 'n straat-hoek:



Daarna is ek Docklands toe. Docklands is die waterfront in die Victoria hawe, wes van die binnestad. Daar is meestal net restaurante, en in die middel van so 'n onplesierige dag is dit maar baie stil. Met al die eetplekke daar en die uitsig oor die hawe en die stad kan dit nogal besig wees op 'n goeie aand. Docklands is ook net oorkant die straat van die Telstra Dome - Melbourne se grootste Footy stadion. Hierdie fotos het ek by Docklands geneem:







Van Docklands af het ek 'n trem gevat na die oostekant van die stad waar Fitzroy Gardens, die stadsmeuseum en die parliment-gebou is.

Eerste aan die beurt was Fitzroy Gardens (sien ook hier vir meer). Dis 'n pragtige tuin, meer as 'n stadsblok groot met so paar geskiedkundige aantreklikhede soos Cook's Cottage en die Conservatory ("Built in 1929, the Conservatory contains an impressive variety of fine flowering plants. There are five different plant displays each year and the historic building is a popular location for garden weddings."). Terwyl ek in die park rondgeloop en fotos neem het, het ek op 3 troues afgekom. In die park is ook 'n klein speelpark met 'n swaai en glyplank vir klein kinders. Plek-plek is daar ook lekker groot oop areas waar mense saam hulle kinders bal skop en speel. Hierdie fotos het ek in die park geneem (Cook's Cottage, Conservatory en ander):









Na Fitzroy Gardens het ek paar fotos van St. Patrick's Cathedral geneem wat net oor die straat van die park is:







Reg oorkant die straat van St. Patrick's Cathedral is 'n Duitse kerkgebou ook:





'n Blok verder van die kerke af is die parlement-gebou en die stadsmuseum. Ek was nie lus om deur nog 'n museum te loop nie en het net 'n foto van buite af geneem:



Die Royal Windsor hotel waar nog 'n troupaartjie fotos geneem het:



Die parlement-gebou waar nog 2 troupaartjies fotos geneem het:





Toe het dit begin reën en dit het nie gelyk of dit gou wil ophou nie so toe vat ek 'n trem terug hotel toe en dis die einde van die dag se verkenning. Die aand was Harry Potter and the Goblet of Fire op Channel 9 toe kyk ek dit - anders as MNet en Movie Magic adverteer hulle in die fliek. Gereeld. Op al die kanale wat die hotel het wat flieks wys doen hulle dit.

Sondag was baie koud. Op die nuus wys hulle van sneeu wat iewers in die omgewing val maar ek weet nie waar dit is nie - gelukkig is dit nie in die stad self nie. Daar was ook 'n bosbrand oos van die stad wat Vrydag al begin het en Sondag eers onder beheer gebring is. Ek het die dag in die hotel deurgebring en bietjie vir die eerste keer in 'n lang tyd kans gehad (en dit gebruik) om bietjie die laptop te her-organiseer en van ou onnodige goed ontslae te raak (die hardeskyf was al naby vol en die oefening was nodig).

Die weervoorspelling vir die week vorentoe lyk net so koud en onplesierig. Ek hoop die klere wat ek gepak het hou my warm genoeg!

Tweede naweek

Hierdie naweek was meer rustig as die vorige een.

Vrydag aand kon ek gladnie aan die slaap raak nie het uiteindelik opgestaan en maar voor die TV gaan plak. Ek het ongeveer 4vm Saterdag oggend moeg geraak en gaan slaap. Saterdag oggend ongeveer 10:30vm was ek wakker as gevolg van konstruksie werk in die gebou langsaan.

Saterdag het ek wasgoed afgegee om te was en stryk. In plaas daarvan om die trem te gebruik het ek gestap en 'n ander roete probeer. Dit was deur 'n ouer deel van St Kilda en hier het ek afgekom op 'n speelpark vir kinders, die geboorte huis van Stanley Melbourne Bruce (Prime Minister of Australia, 1923 - 1929), en so paar pragtige plekke wat weggesteek is tussen die ouer meer vervalle geboue.

"St Kilda Adventure Playground" - Dis 'n baie oulike speelpark en goegang is gratis. Die apparate is alles in 'n goeie toestand, baie kleurvol, en groot verskeidenheid. Bedoel vir kinders van 6-12 jaar oud met toilet geriewe. Binne die speelpark is onder andere 'n sandput (onder skadunet), trampolien (onder bome), 'n verskeidenheid van klimrame (meestal hout, almal geverf) met temas wat insluit indiaan, seerower, kasteel en ander. Daar is selfs 'n ou klavier waarop die kinders kan speel.









Hierdie is so paar fotos van die die huis waar Stanley Melbourne Bruce gebore was:









Hierdie is so paar van die ander fotos wat ek in die area geneem het:











Saterdag aand was ek genooi vir ete by nog 'n paar Suid-Afrikaners se huis - Floris en Marie van Ryn wat oorspronklik van Nelspruit af is. Die wat my ken sal weet ek eet nie graag vis nie, maar Floris is 'n meester vis braaier en dit was die lekkerste vis en garnale wat ek nog geëet het. Weereens dankie Floris en Marie vir julle gasvryheid!

Saterdag aand ongeveer 11:30nm was ek uit soos 'n kers.

Sondag het ek eers 11:15vm wakker geword en besluit om die dag rustig te vat. Meeste van die dag het ek in Victoria Gardens rondgeloop. Meeste fotos was maar van monumente daar (en daar is baie). Ek het van die suide kant van die tuine af begin deurstap noordekant toe. By die "Shrine of Remembrance" het ek nog fotos geneem, hierdie keer van die balkon af (die museum is in die dag oop tot 5nm) van die omliggende omgewing.

In hierdie foto wat suid kyk, is Albert Park Lake aan die regterkant sigbaar, en op die horison net anderkant die park is die see. Die ry van hoë geboue is almal langs St Kilda Road. Die plek waar ek bly is ook daar tussen die lot (aan Albert Park se kant van die straat iewers naby die verste punt).



In hierdie foto wat noord kyk, is die voetpaadjie wat na die monument toe loop, met Melbourne stad in die agtergrond.

BATMAN avenue...

En nog 'n foto van suid-oos Melbourne van die oorkant van die Yarra rivier af. In die voorgrond op die water is een van die bote waarop mens 'n rivier toer deur Melbourne kan doen.

En dis die einde van nog 'n naweek...

Eerste naweek

Vir my eerste naweek in Australië het ek so bietjie die onmiddelike omgewing verken. Hoofsaaklik St Kilda self en ook so bietjie van Melbourne stad.

Saterdag...

In St Kilda het ek bietjie afgestap strand toe. Hierdie fotos is van hoe dit lyk in Fitzroy straat wat van St Kilda straat af strand toe loop.







En so paar fotos van hoe dit by St Kilda strand lyk - nou nie Margate nie, maar dis nie te sleg nie.







Daarna is ek op die trem op in die stad in. Oppad in stad toe het iemand se kar voor 'n trem beland, toe staan alles vir 'n ruk. Die trem-lane is in die middel van die pad, so weerskante van hulle is die motor-bane wat in beide rigtings loop. Die spesifieke persoon het nie mooi in sy baan gebly nie en so bietjie van sy kar se verf teen die trem afgesmeer. Die ongeluk was net mooi langs die Victorian National Museum - ek het nie beplan om daar in te gaan nie, maar aangesien ons nou daar moes stop het ek sommer gou bietjie kultuur in my lyf gekry...

Ingang tot die museum is verniet. Die museum het 3 vlakke, en op elke vlak is daar meer as een stel uitstallings van beelde, skilderye, meubles en nog wat. Baie interessant, maar dis 'n museum...

Ek het fotos in die museum geneem maar niks wat die moeite werd is om hier te wys nie - mens mag nie die kamera se flash gebruik in die museum nie.

Na die museum het ek sommer verder gestap tot by die Yarra rivier. Dis waar die stad begin. Wanneer mens op die brug staan sien jy een kant toe die MCG (Melbourne Cricket Ground) - dis nogal 'n groot stadion. Anderkant toe sien mens 'n groot trein stasie wat ook 'n toeriste aantreklikheid is. Ek het net oor die Yarra rivier in die eerste straat afgestap tot by die akwarium ($25 ingang, en dis nie eers 'n baie groot akwarium nie!). Daar het ek so bietjie fotos vir die kinders geneem van al die snaakse goed en natuurlik van die haaie ook.

Na die akwarium was ek moeg en dit het begin laat word. Rondom die rand van die middestad loop 'n trem ("Circle Tram") waarop mens verniet kan ry. Hy ry tussen 10vm en 6nm elke 10 minute van elke stop af. Ek het hom toe sommer gevang terug Yarra brug toe oppad hotel toe.

Net oorkant die Yarra rivier het ek eers weer paar fotos van die stad geneem, want toe raak dit donker en dit het gelyk na mooi fotos. Hieronder is so paar van hulle. Die oranje-rige gebou langs die rivier met die groot horlosie toring is die stasie wat ek genoem het.











Verder het ek ook oppad terug hotel toe fotos geneem van die "Shrine of Remembrance" - dis 'n monument wat die lewens gedenk van mense wat gesterf het in die oorlog van 1914-1918. Kyk hier om meer oor die monument te lees.





En hier is ook 'n foto van Melbourne van die monument af.



Dit was die einde van die dag - toe is ek moeg en het gaan slaap!

Sondag...

Sondag het ek die dag spaandeer saam André en Annelie Broekman. André het baie gehelp met alles in die proses om my hier te kry, en hy werk ook op die Data Migrasie span van die projek. André en Annelie kom ook uit die Centurion area. Hulle het my gevat om bietjie van die omgewing suid van Melbourne te verken, hoofsaaklik langs die kuslyn af. Dis alles nogal baie mooi. Middagete was by 'n klein eetplekkie langs die kus, en daarna het hulle my ook die area gaan wys waar hulle bly - Brighton Beach. Aandete was by hulle huis gewees en later het hulle my weer by die hotel afgelaai. Dankie André en Annelie vir die rondrits en die lekker kos!