Naweek 16

Hierdie week het ons lekker weer gehad. Dit was ons eerste week in die nuwe blyplek (sien vorige week se blog) en sover bly ons nog lekker. In die week het ek besluit om maar cable tv te kry (Foxtel) maar die installasie gebeur eers Dinsdag 29 Julie. Ons kry nie die gratis kanale met die haas ore antenna opgevang nie.

Vir 'n verandering het ek en die kinders bietjie koekies gebak in die nuwe blyplek. Ons het Rice Krispies koekies gemaak (dankie Ouma Ria vir die resep) en dit het nogal lekker uitgekom. Die kinders het dit geniet dat Pappa saam met hulle koekies gebak het!

Hier is bietjie fotos van die koekies bak...




Vrydag het Annelie vir Marlize en die kinders saamgevat na 'n binneshuise speelplek toe. Die plek se naam is Kids Space - soortgelyk aan Wacky Warehouse in Suid Afrika. Die kinders het hulle flou gespeel.



Gister was ons Lake Mountain toe saam Andre en Annelie en kinders, Floris en Marie, Jeanetta en kinders. Dit was nou 'n heerlike belewenis. Ons het lekker in die sneeu baljaar!

Ons het sneeu klere gehuur vir die dag - dis nogal lekker warm en waterdig. Ons het vir elkeen 'n sneeu slee (toboggan) ook gehuur.

Ons was sommer vroeg op gewees - hulle het ons al 07:00 kom oplaai. Lake Mountain is so 90 minute se ry van waar ons bly af, en dis die pragtigste omgewing waardeur ons gery het. Mens wil net al die tyd fotos neem maar deur die kar se venster wou dit nie werk nie en dis te koud om die venster oop te maak vir 'n foto!

Ons was so net na 09:00 daar en toe is daar al reeds hordes mense! Die kinders was sommer dadelik reguit na die naaste sneeu toe wat hulle gesien het, en dis sommer die wat langs die pad le waar ons gestop het. Toe laai ons alles uit die kar en vat hulle saam waar daar nog meer sneeu is. Nog meer sneeu?! Hulle was baie opgewonde om te sien hoe die hele wereld wit van die sneeu le soos wat ons nader aan die eintlike oord se sneeu kom.

Hulle kon nie wag nie - hulle was sommer dadelik op die toboggans om te ry.

Ek en Marlize het ook gery. Gelukkig is daardie pret nie net vir kinders nie! Dis net vrek uitputtend - as jy onder kom moet jy al die pad weer loop tot bo sodat jy weer kan ry, en die probleem daarmee is dat mens nie genoeg kan kry nie! As die kinders ry moet jy hulle help tot bo, en as jy self ry moet jy ook weer loop tot bo!

Daar is drie toboggan runs (plekke waar mens kan afgly) en ons het al drie gery. Dit was soveel pret, ons het net genoeg fotos geneem om te bewys ons was daar, die res van die tyd was die kamera in die sak!

Later in die middag, terwyl ons op die derde toboggan run was, het dit begin sneeu ook. Was dit nou lekker! Eers net baie fyn, maar later sommer sulke lekker groot vlokkies. Elmarie was al stokflou en het die nie so baie waardeer nie, maar Hannes kon nie genoeg kry nie! Hy't sommer in die sneeu sy toboggan gery!

Teen ongeveer 16:30 het ons ook opgepak en terug gery want ons moes van die goed wat ons gehuur het al 18:00 terug he - dit was by 'n dorpie tussen Melbourne en Lake Mountain.

Dit was een van die lekkerste dae wat ons nog hier in Oz gehad het.

Hier onder is fotos...

Naweek 15

Hierdie naweek het ons uit die hotel uitgetrek. Die hotel wat ek vir 15 weke lank "huis" genoem het. Nou's ons in 'n nog kleiner plekkie in maar dis darem nie 'n hotel nie. So ons moet nou self die beddegoed was... he-he.

Die plek is darem nog lekker naby aan die werk. Net so 6 trem stoppe in die straat af wat voor die kantoor verby loop. Daar is ook 2 trems wat verby die stop ry waar ek kan op/af klim. Dis ook net ongeveer 100m se stap van die woonstel blok se ingang af tot by die trem stop.

Die perseel het twee blokke - gebou A en gebou B. Gebou A is direk langs die straat (suidekant van die straat) en gebou B is agter gebou A (suidekant van gebou A) met so bietjie van 'n oop spasie tussen-in. Nie veel nie, net genoeg om te maak dat ons son kry regdeur die dag. In die straat direk langs blok A is 'n klein kruideniers winkel - baie gerieflik!

Die woonstel wat ons het is 'n 2-slaapkamer met 1 badkamer, oopplan sit/eetkamer, en 'n kombuis. Die kombuis is eintlik 'n deurloop van die deur af na die oopplan woonvertrek toe. In die kombuis is 'n gasstoof en gas-oond met extractor fan, yskas-vrieskas combo (so hoog soos Marlize lank is), 'n (klein) skottelgoedwasser, mikrogolfoond, en binne-in 'n kas weggesteek is 'n wasmasjien en tuimeldroeer. Die kas het 'n "extractor fan" in sodat mens dit kan toe hou terwyl mens die wasmasjien/tuimeldroeer gebruik. Hier is ook al die ander toestelle wat mens benodig, o.a. 'n strykplank en strykyster, ketel, broodrooster, HD-tv (ongeveer 74cm), DVD-speler, lugverkoeler, en ander goed soos besem, mop, stofsuier ens. En hier is nie 'n asblik nie! Hulle sal blykbaar vir ons een kry... Alles is splinternuut behalwe die stoof, oond en skottelgoedwasser, wat alles ook relatief nuut is. Die matte is ook splinternuut, net soos die ander meubels (bank, eetkamer stel, lampies, bedkassies, beddens). Beddegoed en handdoeke is ook splinternuut.

Hier is fotos...

Oopplan woonvertrek met hoofslaapkamer na regs:


Oopplan woonvertrek:


Kombuis met tweede slaapkamer na links:


Tweede slaapkamer:


Hoofslaapkamer:


Badkamer - tussen die twee slaapkamers - geen bad nie, die kinders stort!


Kombuis:


Wasmasjien en tuimedroeer in die kas weggesteek:


Om die trek makliker te maak (was seker maklik genoeg, ons het net 4 tasse en bietjie kruideniers gehad om te trek...) het ons 'n kar geleen. Dankie Andre en Annelie Broekman! Die hele inpak, trek, uitpak, eerste skoonmaak en stofsuig ensovoorts het ons die hele Saterdag besig gehou.

Ons weet nog nie hoe werk die skottelgoedwasser nie - al die handleidings wat ons op die internet kry is in Pools! Ons sal om nog uitwerk.

Vandag het ons gaan rondry met Annelie se kar - ons was by Bundoora Park. Binne Bundoora Park is Cooper's Settlement waar ons met 'n trekker-rit (binne-in 'n wa) kangaroos en emus in lewende lywe gesien het binne die "Wildlife Reserve". Verder by Cooper's Settlement is daar so bietjie van 'n plaas waar ons ook ander plaasdiere gesien het, o.a. 'n pienk vark, hoeders, eende, ganse, bokke, skape (Elmarie het gehelp om 'n lammetjie te "bottle-feed"), en nog iets wat ons nie in Suid Afrika ken nie... 'n Alpaca (wel, eintlik meer as een). En die kinders het elkeen ook op 'n ponie gery.

Hier is fotos...

Cooper's Settlement:


Emu:


Emu met kleintjie:


Kangaroo:


Baie kangaroos:


Die trekker en die wa waarin ons gery het:


In die vangwa... he-he:


Reg vir die ponie rit:


Elmarie op die ponie:


Hannes op die ponie:


Elmarie voer die lammetjie:


'n Wit alpaca:


Bruin alpacas:


En oppad terug het ons nog iets gesien wat mens nie in Suid Afrika sien nie...



Vir die wat wonder wat dit is - ek sit nie die foto in vir die wat nog nie 'n trem gesien het nie, ek sit om in om te wys daar is plekke waar die karre en die trems die pad deel. Hier ry ons agter een.

Dit was 'n lekker en uitputtende naweek.

Naweek 14

Drie groot goed het hierdie week gebeur...

1. Langermyn visa - My langtermyn visa (temporary business long stay, subclass 457) is Maandag 7 Julie toegestaan. Dit beteken dat ek lank genoeg hier kan bly om die projek waarop ek nou werk klaar te kan maak. Dit het vinniger gegaan as wat ons verwag het. En Dinsdag het ons na die immigrasie kantoor in Melbourne gegaan om die visa in ons paspoorte te laat insit. Die plek was uiters effektief - ons was net 10 minute lank daar. Nommer gekry, op lekker gerieflike banke gesit en wag met big-screen tv's tot hulle ons nommer roep op 'n luidspreker stelsel (waar mens kan hoor wat hulle se!) en dit word geflits op 'n duidelik leesbare elektroniese letterbord. By die toonbank druk hulle die visa sommer uit terwyl jy daar staan en plak dit dan in jou paspoort. Dan is jy klaar.

2. Ander blyplek gekry - Omdat die 457 visa goedgekeur is gaan die klient nie meer betaal vir ons huidige hotel kamer nie en moes ons soek vir ander blyplek. Ons het na baie plekke gekyk op die internet om pryse en kwaliteit te vergelyk. Op die ou end het ons drie uitgesonder om te gaan besigtig en die agente gekontak om afsprake te maak. Die eerste een wat ons gesien het, het ons gevat. Ons behoort Saterdag daar in te trek en sal later meer vertel oor die nuwe blyplek (en fotos wys).

3. Elmarie word DRIE !!!




Saterdag 12 Julie 2008 het Elmarie 3 jaar oud geword. Ons het hard probeer om dit vir haar baie lekker te maak. Die hotel kamer het nie 'n oond nie so ons kon nie 'n koek bak nie, maar Marlize het 'n sponskoek gekoop en die kinders het help om dit te versier. Die kinders het dit baie geniet.



Ons het ballonne gekry, kersies vir die koek (gelukkig het die kamer se brand-alarm nie afgegaan toe die kersies gebrand het nie!) - gelukkig is daar net 3 kersies op die koek en nie 30 nie!


Ons het verjaarsdag koek vir ontbyt geeet. Die res van die dag was ons Luna Park toe. Ons was voor oopmaak tyd daar. Ons staan en wag links onder by die nar se mond (die ingang is nog toe).


Dit was koud, maar dit was lekkerrr.







Ons was lank in die pretpark. Middagete was by McDonald's oorkant die pad, en toe's ons weer terug pretpark toe vir nog speel. Die laaste ding wat ons gedoen het was om die roller coaster te ry. Ons was almal op hom so ons kon mekaar nie afneem nie. Ons het heel voor gesit en al die wind gevang. Dit was koue wind. Dit was nog steeds baie lekker. Hannes wou graag voor sit en toe werk dit net mooi so uit. Op die foto wat hulle neem as mens ry is Hannes se oe toe en Elmarie is agter pappa weggesteek toe besluit ons om nie die foto te koop nie.

Dit was 'n baie lekker verjaarsdag dag.

Vandag was ons by Esplanade Market in St Kilda. Dis soos 'n klein vlooimark. Blykbaar 'n toeriste-aantreklikheid. Die vlooimark is die grootste deel van Esplanade road wat langs die strand afloop in St Kilda. Op die webblad kan mens kyk wat al die stalletjies bied, wie elke stalletjie besit en sy/haar kontak besonderhede. Hier is 'n foto van die vlooimark. Die hele straat hou net so aan tot aan die ander punt.


Dit was 'n propvol en opwindende week.