Verlede naweek het ek gaan kyk na so paar plekke om te bly vir volgende jaar, en op die ou end 'n aansoek ingesit om te huur op een van hulle. Die aansoek was toe goedgekeur en die deposito is betaal. Dit is 'n dubbelverdieping duet, 3 slaapkamer, 2.5 badkamer met studeerkamer, aparte waskamer en toesluit motorhuis. Die plek het ook "central airconditioning". Dis in 'n lekker stil straat, baie naby aan die laerskool. Ek was Saterdag weer daar om fotos te neem en afmetings te kry. Hier is fotos van die plek...
Van die straat af:
Van agter af, die erf is nogal smal (halwe erf eintlik) maar darem redelik lank - grassny behoort my nie te lank besig te hou nie:
Die oopplan leef-area onder (onder is ook 'n gaste toilet, die waskamer en die studeerkamer):
Die slaapkamers en 2 badkamers is bo, en die trappe op en die hele boonste vloer het matte (behalwe natuurlik die badkamers, dis teel vloere). Die leef-area en kombuis is bietjie kleiner as waaraan ons gewoond is maar dis groot genoeg.
Ek was ook vir die eerste keer hier:
"The South African Shop" is 'n redelike klein winkeltjie wat voedsel produkte wat in Suid Afrika vervaardig word invoer, bv. Romany Creams, ProVitas, All-Gold tamatiesous, Mrs Ball's chutney ens. Hulle het 'n online shop en twee winkels - hierdie een is in Caulfield, nie ver van die nuwe blyplek af nie. In die "shebeen" verkoop hulle onder andere Casle Lager, Klipdrift, KWV en Amarula.
Dit het die hele Vrydag en Saterdag lekker gereen in Melbourne. Hierdie naweek alleen het die staat van Victoria meer as 65mm reen gekry en dit is bo-gemiddeld vir die hele Desember maand. Hierdie foto het ek geneem oppad terug woonstel toe van die nuwe huis af:
Nog net 6 slapies... my vlug is Saterdag oggend vroeg en as die vlug op skedule afloop land ek Saterdag 20 Desember om 17:50 in Johannesburg. Ek kan nie meer wag nie.
Daar sal waarskynlik eers in Januarie weer 'n nuwe inskrywing op die blog wees.
Vir almal wat ek nie weer voor Kersfees gaan sien nie: Geseende Kersfees en Voorspoedige Nuwe Jaar!
- Johan
Posts
