Naweek 46

Hierdie week was maar redelik stil. Geen fotos ook nie.

Met Hannes gaan dit goed by die skool. Hy het hierdie week aan 'n "assessment" deelgeneem en volgens die juffrou gaan dit goed maar ons moet hom bietjie help met die klank van die letters van die alfabet. Hy's nog nie so goed met die Engelse klanke soos die ander maatjies wat engels grootgeword het nie... ;-) Hulle verwag nog nie die kinders moet kan lees nie, maar hulle moet al darem die letters en hulle klanke ken. Gelukkig ken hy darem al die hele alfabet in Afrikaans en Engels maar al die letters klink nie dieselfde in Engels en Afrikaans nie.

Vrydag het ek vir die eerste keer die gras gesny - net na ons ingetrek het, het iemand van die eiendomsagente se kant af die gras gesny (hulle moes eintlik voor ons ingetrek het), en nou was dit alweer lank. Dit voel soos gister wat ons ingetrek het maar dit was nie gister nie. Al reen dit nie hier nie - en mens mag ook tans nie grasperke natspuit met munisipale water nie - het die gras nogsteeds redelik gegroei. Ek dink die oggend dou hou hulle aan die lewe, die stukke wat wel nog lewe! Maar met die min reen saam was dit nogal 'n stowwerige besigheid.

Gister het ek en Marlize wakker geword met keelseer en toe neuse. Ons was albei plat met die gogga wat ons beetgekry het. Ons het selfs die grootste deel van die middag aan en af geslaap so tussendeur die kinders wat om ons speel. Heelwat medikasie en rus later voel ons altwee weer baie beter vanaand.

Vanaand het ons die eerste Afrikaanse kerk erediens in Oz bygewoon - dis nogal ver van ons af, so amper 'n uur se ry (nog steeds is die vinnigste wat ons gery het net 80km/h... Melbourne is groot!). Baie interessant, saam met Marlize is daar 4 oud-Sappi mense! En van Wierdapark Suid NG gemeente (waar ons was) is daar ook 'n paar mense. Die wereld is baie klein. Baie van die mense daar het sommer by daardie gemeente ingeskakel (sommiges bly daar naby ook) en ander (soos ons) kom van ver af vir die Afrikaanse diens wat eenkeer per maand gehou word in die aand.

Ons het ook vandag 'n trampolien bestel op die internet - hy behoort binne 2-3 werksdae afgelewer te word. Ons kan nie meer wag nie. Volgende week sal ons fotos he van die kinders op die trampolien...

Naweek 45

Hierdie hele week het dit baie goed gegaan met Hannes by die skool. Daar was net een oggend wat hy nie wou skooltoe nie (Donderdag), maar dit was omdat sy juffrou gese het sy gaan vir 'n rukkie nie in die klas wees nie, dan gaan 'n ander juffrou bietjie na hulle kyk. Dit was vir die oggend se inligting sessie met die ouers, waar Marlize en Elmarie was, waar hulle vir die ouers bietjie vertel van die skool roetine, wat met die Prep kinders gedoen word ens. Net 'n uur. Hy was darem weer in 'n goeie mood teen oplaai-tyd. Ons is baie bly dit gaan so goed met hom by die skool.

Dinsdag het Hannes en Elmarie bietjie kuns gedoen by die huis - sommer brandweer manne gemaak met ou toilet rolle, bietjie papier, gom en inkleurwerk.



Woensdag het Elmarie bietjie met die stensils gewerk terwyl Hannes by die skool was.


Hannes het by die skool 'n prent gemaak wat hy huistoe gebring het. Die kinders moes die woordjies "I am at school" inpas onder die teks wat reeds geskryf was, en hulle moes die prentjie self inkleur net soos hulle wil. Die mannetjie met die pers klere is hoe hy homself geteken het. Die prent onder is sy eie inkleurwerk. Die oranje kolletjie aan die regterkant is die plakkertjie wat hy by die juffrou gekry het omdat syne so mooi ingekleur was. Hy is baie trots op die plakkertjie.


Vrydag aand was ons na Chadstone Shopping Center se Toys R Us toe om vir hulle scooters te koop. Hulle vra al baie lank daarvoor en daar is 'n vrou by die skool wat haar kind sommer met een gaan op- en aflaai want hulle bly ook net 'n blok van die skool af. Die tannie se scooter wat nou elke dag daar by die skool is het net 'n groter gesmeek afgegee. So toe sit ons maar af speelgoedwinkel toe want Marlize het gesien die goed is op uitverkoping - so te se 2 vir die prys van 1, so toe koop ons maar... maar die opgewondenheid kan ek nie beskryf nie. Hulle was so bly, hulle het nie geweet hoe om die emosies uit te druk nie! Terug by die huis wou hulle ook nie gaan slaap nie, so ons moes eers die scooters opslaan sodat hulle (in die donker!) daarmee kan ry voor hulle bed toe is.



Toe die kinders nou eventueel rustig raak in die bed se ek vir hulle "lekker droom van julle scooters, en more oggend kan julle weer gaan ry". Die eerste woorde uit Elmarie se mond toe sy wakker word saam die son was baie opgewonde "nou gaan ek weer met my scooter ry!"... !!! Hannes was kort na haar wakker en skielik net so opgewonde. Ons hou toe vol hulle moet maar eers ontbyt eet (anders gebeur dit ook nie) - dit was die vinnigste wat hulle nog ontbyt geeet het in 'n lang tyd!

Na ontbyt het hulle my by die werk gaan aflaai (ja, op die Saterdag, ons projek werk mos nou elke tweede naweek) en 'n parkie gaan soek om nog met die scooters te gaan ry.


Die parkie het 'n lekker speelplek ook, so toe die bene moeg is vir die scooters was daar darem iets anders ook om te doen.


Later het hulle vir my Valentynsdag kaartjies gemaak.
Hannes sin ('n Cheetah)...


Elmarie sin ('n Beertjie)...


Saterdag aand was daar 'n gratis musiek opvoering by die Sydney Myer Music Bowl (ter viering van die Bowl se 50ste verjaarsdag) en ons het soontoe gegaan. Oppad soontoe is ons verby die "Shrine of Remembrance" (foto-geleentheid)...



Hier is ons amper by die Music Bowl... daar was *baie* mense want dit was 'n lekker aand, windstil en nie te warm nie. EN dis valentynsdag.


Ons kon nie meer plek binne kry nie, toe sit ons maar buite op die gras en hou piekniek daar. Net so lekker want die kinders kon bietjie rond hardloop ook.


En groot krieke in die gras ontdek - ek self het nie die kriek gesien nie (was te lui om van die kombers af op te staan) maar ander kinders het ook vir die ding geskrik wat so hard lawaai. Dis natuurlik groot nuus...


Wat bietjie ondersoek nodig gehad het van 'n volwassene ook!


Volgende Saterdag is daar nog 'n rondte van klassieke musiek by die Music Bowl, die plan is om volgende naweek vroeer daar op te daag sodat ons ook binne 'n sitplek kan kry om bietjie van die musiek te sien.

Vandag het ons bietjie rondgesoek vir 'n trampolien, eers op die internet en toe bietjie gery ook. Nog niks gekoop nie, dis nogal duur en ons wil eers bietjie mooi kyk na wat is nou die nuutste standaard en die regte pryse. Nog niks gekoop nie, maar dit sal dalk ook eersdaags gebeur.

Vanaand het ons ook die braaier vir die eerste keer gebruik wat Andre-hulle vir ons gegee het. Hannes het al gister gevra wanneer ek nou vir ons gaan vleis braai, so vandag was dit ook op die agenda. Dit was nou lekker. Met roomys vir nagereg. Lekkerrrr!

Die naweek is heeltemal te kort as mens nog moet werk ook. Gelukkig is dit (nog) nie elke naweek nie, en dit sal seker eers weer ophou as die projek eendag klaarmaak...

Naweek 44

Hierdie week Woensdag was die eerste skooldag vir Hannes by die laerskool. Dinsdag het ons die skoolklere gekry wat hy nodig het en ook die juffrou ontmoet (wel, Marlize en die kinders het die juffrou ontmoet).

Die hele week was Hannes baie opgewonde om skool te begin. Woensdag oggend was niks anders nie, en ons het sommer eers gou fotos geneem voor hy skooltoe is...





Hannes het ook op die dag voor skool begin het, toe hulle die juffrou ontmoet het, al sy eerste huiswerk gekry - teken enige iets wat jy wil. Hier is Hannes se tekening:


In die vorige week was daar nogal groot excitement oor die vullis lorrie - hier is dit bietjie anders as in Suid-Afrika, daar is nie 'n span van ouens nie, net die lorrie drywer. Die vullis lorrie het 'n meganiese arm wat die asblik optel, omkeer in die lorrie, en dan ry hy net verder. Die drywer doen sommer alles. So toe hulle hierdie week weer verbykom het Marlize dit sommer afgeneem (die vorige week het die kinders gese ons moet dit afneem sodat ons vir almal die fotos kan wys van die vullis lorrie met die "arm"). So, hier is die vullis lorrie met die arm!

(Dis geneem deur die gaas van die venster so dis dalk bietjie onduidelik.)

Vandag het dit die eerste keer gereen hier by die huis vandat ons hier ingetrek het. Na twee verskriklike warm weke was dit heerlik! Dit het vir minder as 5 minute gereen hier by ons maar dit was baie baie lekker.


Saam met die goeie nuus van reen hier by ons is daar ook baie slegte nuus in Victoria - die ergste bosbrande sedert "Black Friday" - Vrydag 13 Januarie 1939. Daar is volgens die nuusberigte, terwyl ek nou hier tik, al 84 mense dood, meer as 700 huise afgebrand en meer as 312,000 hektaar grond is geaffekteer. Lees meer hier.

Baie dankie vir al die SMSe en emails om te hoor of ons ong okay is. Ons is. Die brande is meer noord en oos van die stad.

Vandag was ons Caulfield Racecourse toe gewees vir 'n South East Water familie pretdag. Daar was perde wedrenne ook. Ons het met die trein gery want van die stasie hier naby ons af ry mens reg verby dit op pad in stad toe. Die stop waar ons moes afklim is by die plek en sy naam is...


Dis nogal 'n mooi ou gebou met 'n deel wat heel nuut gemaak is ook, en die "grand stand" is op die oomblik besig om omskep te word in 'n baie moderne een, so die ou dele word tans afgebreek en die nuwes is alles agter glas, met aircon en al.



Eerste op die lys was natuurlik die ponie ritte - hier sit ons en wag vir ons beurt...


En nou is dit ons beurt...



Daar is ook 'n perdry video-game en Hannes het dit nogal geniet - dis net soos die motorfietse in die arcades, jy moet om die draaie ry, oor die hindernisse spring en als, en jy moet ook op die regty tye die regte spoed ry sodat jou perd nie te gou moeg word nie.


Terwyl Hannes perd gery het, het Elmarie haar gesig laat verf:


Daar was ook 'n massiewe groot springkasteel-slide. Die kinders het baie tyd daarop spandeer, veral Hannes. Freddo die padda was ook daar, en hier is Hannes saam met hom op die slide:


Daar was opvoerings vir die kinders (alles aangebied deur Sout East Water - hulle is maar soos Rand Water daar in Johannesburg):


Elmarie en Mamma ry bietjie in 'n tee-koppie:


Ons het bietjie gekyk hoe word die perde vertoon voor die wedrenne sodat die ouens wat hulle geld wil wegwed eers kan kyk op watter perd hulle dit wil doen...


Terug by die speelplek is die kinders bietjie in die GymBus - dis 'n dubbel-dekker bus wat in 'n klimraam omskep is:


Daar was ook bietjie van 'n vertoning met Humphrey B Bear ('n Ozzie ding) en Elmarie het dit nogal geniet. Sy het lekker saam gedans en gespring en deelgeneem.



En na die tyd kon al die maatjies 'n "cuddle" by Humphrey B Bear kry, en Elmarie het haar "cuddle" ook gaan haal - sy't mooi geduldig gewag om ook 'n drukkie by die beer te kry:


Ons moes ook darem vir die kinders wys hoe hardloop die perde, want dit was tog een van die goed waarna hulle uitgesien het om te sien! Hier is paar van die fotos wat ons by die renbaan geneem het:







Die wenner van die wedren wat ons so mooi dopgehou het:


Die kinders het ook lekker op die groot stuk groen gras rondgehardloop, net soos die perde...


Daarna was dit eers weer terug om nog te gaan speel.




Laaste ding voor ons weer die trein huistoe gevat het was snow cones - Hannes vra al vir 'n week lank hy wil 'n snow cone he en net toe ons begin terugloop sien ons 'n stalletjie raak wat dit verkoop - hulle was altwee nogal baie bly oor die snow cones:


Die week wat voorle se weer vooruitsigte is baie koel (lae 20's) met reen - ons hoop dit help om die bosbrande onder beheer te bring.